Fakulteti i Arkitekturës i Univeristetit të Prishtinës, u angazhua aktivisht në organizimin e Garës Studentore në Dizajn, iniciuar nga Shoqata e Përpunuesve të Drurit në Kosovë në kuadër të Konventës së Shtatë të Industrisë së Drurit. Nga një numër i madh aplikimesh nga studentët e Fakultetit të Arkitekturës në thirrjen e hapur të Garës Studentore në Dizajn, komisioni vlerësoj tetë studentët finalist, të cilët patën rast të prezantojnë punimet e tyre në panelet ekspozuese të Konventës së Shtatë. Në këtë garë studenti Blendar Hazrolli i Fakultetit të Arkitekturës triumfoi me vendin e tretë, nga një numër i madh i propozimeve të ardhura nga katër institucione të ndryshme të arsimit të lartë në vend.
Gjithashtu, Fakulteti i Arkitekturës, i përfaqësuar nga prodekanja për cilësi dhe bashkëpunim ndërkombëtar, Prof. Asst. Flaka Xërxa Beqiri, ishte pjesë e panelit të diskutimit “Akademia dhe Industria e Drurit”. Gjatë këtij diskutimi u shpalos strategjia e fakultetit për formalizimin e marrëveshjeve të ndryshme të bashkëpunimit vendor dhe ndërkombëtar. U theksua gjithashtu përfshirja aktive e studentëve në konkurse dhe përvoja të ngjashme me garat e industrisë së drurit.