Është kënaqësi të ndajmë informatën se studentët e Fakultetit të Arkitekturës të Universitetit të Prishtinës sërish ngadhnjejnë në një garë ndërkombëtare projektimi në platformën ‘Inspireli‘. Studentët e vitit të pestë të Fakultetit të Arkitekturës, të Universitetit të Prishtinës ‘Hasan Prishtina‘, janë shpallur një nga tre fituesit e garës, në një konkurrencë prej 150 projektesh nga 28 shtete, në garën ndërkombëtare projektuese ‘Schindler‘s Ark Saving‘.

Studentët Sibora Ramadani, Eron Shala, Bleranda Hykosmani dhe Albina Zenunaj, shpallen fitues të kësaj gare, në kategorinë ‘Sustainable Living Village‘ me projektin ‘Ecounity‘, vendbanim për jetesë të qëndrueshme në Brnenec të Çekisë, projekt ky që u zhvillua në kuadër të lëndës Projektim – Banim (sem. IX), në vitin akademik 2023_24, nën mentorimin e Prof.Ass.Dr. Rozafa Basha.

Për të parë projektin klikoni në vegëzën https://www.inspireli.com/en/awards/detail/7557

Gara ndërkombëtare projektuese ‘Schindler‘s Ark Saving‘, është një ndër garat e organizuara nga platforma ‘Inspireli‘, ku kombinohet konkursi projektues dhe arsimi. Kësaj radhe ‘Inspireli‘ organizoi garën në bashkëpunim me familjet Löw-Beer dhe Schindler, për të projektuar memorialin e të mbijetuarve dhe për të ruajtur trashëgiminë e kampit të Oskar Schindlerit në zonën e Brnenecit në Çeki. Pjesë e këtij projekti ishte edhe zhvillimi i zonës veriore të këtij lokacioni në një vendbanim për jetesë të qëndrueshme.

Rikujtojmë se Universiteti i Prishtinës "Hasan Prishtina" është renditur i 14-ti në renditjen botërore Universitare të platformës ndërkombëtare INSPIRELI për arkitekturë dhe inxhinieri civile, ndër 1320 Universitete nga mbarë bota, për periudhën 2015-2023, falë suksesit të studentëve të Fakultetit të Arkitekturës në garën ndërkombëtare për projektimin e resortit turistik ‘Miris Garden‘ në Zarë të Kroacisë, në vitin 2023.

Suksese të mëtutjeshme studentëve tanë në projektet e radhës!