Sot është nënshkruar memorandum bashkëpunimi ndërmjet Universitetit të Prishtinës dhe Universitetit të Lublanës, respektivisht fakulteteve të arkitekturës në të dyja universitetet.

Partneriteti i zyrtarizuar sot parasheh mobilitetin e studentëve, të stafit akademik dhe administrativ, shkëmbimin e publikimeve dhe informatave, organizimin e seminareve të përbashkët, punëtorive, ekspozitave apo konferencave, e të tjera forma të bashkëpunimit, me qellim të arritjes së objektivave të përbashkët.

Nënshkrimin e kësaj marrëveshjeje e bëri rektori i UP-së, prof. dr. Qerim Qerimi, i cili u shpreh i lumtur për arritjen e këtij partneriteti, teksa theksoi gatishmërinë e UP-së për zgjerim të këtij bashkëpunimi edhe me njësi të tjera akademike në kuadër të Universitetit të Lublanës.

Ndërkaq, dekani i Fakultetit të Arkitekturës në Universitetin e Lubjanës, prof. dr. Matej Blenkush, theksoi se, përmes kësaj marrëveshjeje, po hapen rrugë të reja të lidhjeve të drejtpërdrejta ndërmjet Fakulteteve të Arkitekturës në mes dy institucioneve.

Nënshkrimin e memorandumit e përshëndeti edhe prof. dr. Violeta Nushi, dekane e Fakultetit të Arkitekturës, duke e vlerësuar këtë bashkëpunim si shumë të dobishëm për studentët dhe stafin e dy institucioneve.

Pjesë e këtij takimi ishin edhe dy prodekanet e Fakultetit të Arkitekturës në UP, prof. asoc. Vlora Navakazi dhe prof. dr. Arta Basha-Jakupi.