Më 4 korrik 2025, Fakulteti i Arkitekturës në Universitetin e Prishtinës ka nënshkruar një Marrëveshje Mirëkuptimi me Fakultetin e Inxhinierisë të International Balkan University (IBU), me seli në Shkup, Maqedonia e Veriut. Kjo marrëveshje synon të nxisë dhe forcojë partneritetet akademike ndërmjet dy institucioneve përmes një sërë aktivitetesh bashkëpunuese në fushën e arkitekturës,, duke përfshirë:

• Shkëmbimin e studentëve në nivelet përkatëse të studimeve;
• Shkëmbimin e stafit akademik dhe administrativ;
• Bashkëpunimin në organizimin e ligjëratave, studiove, punëtorive, ekspozitave dhe konferencave të përbashkëta;
• Zhvillimin e programeve të përbashkëta arsimore dhe projekteve kërkimore;
• Ngritjen e mekanizmave për transferim të kredive dhe njohje të ndërsjellë të arritjeve akademike.

Ky bashkëpunim ofron një mundësi të re për zgjerimin e përvojave ndërkombëtare për studentët dhe stafin e FA-UP, si dhe për thellimin e lidhjeve institucionale me universitete partnere në rajon.

Kjo marrëveshje në emër të Fakultetit të Arkitekturës është nënshkruar nga Dekanja Prof. Violeta Nushi, nën fasilitimin e Prodekanes për Bashkëpunime Ndërkombëtare dhe Cilësi, Prof. Asst. Flaka Xërxa Beqiri.

Fakulteti i Arkitekturës mbetet i përkushtuar në zhvillimin e partneriteteve akademike ndërkombëtare që fuqizojnë rolin e tij si një qendër e rëndësishme e arsimit dhe inovacionit në arkitekturë në Kosovë dhe më gjerë.